1Jo 1 | MHL | STEP | Aria i parosifa nia siisimomimik fain Opora eena anane eliwa ikowa onoma nain nia maaku naep. Opora nain miiw maa muutitik me imenarowa ikaeya ona naap ikua. I yiena ifan onaiya miimamik ne yiena mokoka-pa urufamik nain maimik. Makena, o yia opap piek nain baliwep akena urufamik.

1 John 1

Eliwa ikowa opora

1 Aria i parosifa nia siisimomimik fain Opora eena anane eliwa ikowa onoma nain nia maaku naep. Opora nain miiw maa muutitik me imenarowa ikaeya ona naap ikua. I yiena ifan onaiya miimamik ne yiena mokoka-pa urufamik nain maimik. Makena, o yia opap piek nain baliwep akena urufamik. 2 Anane eliwa ikowa nain-ke miiw mua areya urufamik. I naap baliwep urufap, nain maemi nia maakimik nain makena-ke. Neemi nia maakimik, mua eena anane eliwa ikowa onoma nain Auwa wiar ikok orop ariman akena miira yia ofakowak. 3 I Auwa ona Muuka Yeesus Krais ikos wi wiamiya kema epaskun ikaimik. I fain naep maa urufap miimamik nain nia maakimik. Ne nis pun opora opap i yiamiya ariwkin unowiya kema epaskun ikaiyen. 4 I unowiya kema eliwa manekiw ikaikua naep parosifa fain nia siisimomimik.

Epa parina-pa soomariyen

5 Aria i o opora yia maakek nain ariman nia maakimik, feenap, Mua Maneka parina-ke, o kokoma marew akena, weetak. 6 I feenap maiyen-na, “I o wameiya kema epaskun ikemik.” Naap maimik, nain epa kokoma-pa ikaiyen-na neeke wadolalimik, opor makena me ookimik. 7 Ne i parina eena ona ikua neeke ikaiyen-na i unow maneka kema epaskun ikaiyen. Ne ona Muuka Yeesus aka-ke yia yasuweya i pina marew, dubila ikaimik.

8 Ne pun i pina marew yiam maiyen-na oram yiena yiam peeskimimik, opor makena me ookimik. 9 Nain i pina wasirkiyen-na, o opora maek nain makena yia opomami pina yiar iiraremi ni pina marew yia nainon. Naeya i dubil maneka ikaiyen. 10 Mua Maneka i unowiya pina mua yia naiya. Ne i maiyen-na, “I pina-ko me onamik,” naap maiyen-na Mua Maneka mua wadola puukowiyen, ne ona opor makena kema-pa me yiar ikua.